Lieber Lemmy,

heit is da Tag gekommen, vor dem i mi 40 Jahre laung gfürchtet hob. Des Unglaubliche is nämlich eingetreten. Der wahre King of Rock'n'Roll, du bist gmant, is verstorben.

I was no wia i mei erste Motörhead Platte mit mein Voda ghuacht hob, i woa domois no kane 14 Joahr jung. Dei Stimm woa scho immer a wengl.....gewöhnungsbedürftig, owa in deiner Musik woa afoch immer so vü Energie und Ehrlichkeit dahinter, wie mas nur vo gaunz wenigen Künstlern kennt hot.

Mei bester Freind (leider a scho verstorben) und i hom daunk Motörhead beschlossen, dass ma unser Leben dem Rock'n'Roll widmen. Wir hom uns die Hoar wochsn lossn und so oft es ging Motörhead ghuacht. Es woa weit mehr ois nur Rock'n'Roll - es woa a wichtiger Wegbereiter fian Heavy Metal. Metal hin oder her, fia mi is und bleibt Motörhead Rock'n'Roll - so wie du es söwa a oft gsogd host.

Unvergesslich is fia mi unsere erste Begegnung. Wir woan in München und hom uns wieder moi a Motörhead Konzert augschaut, wir woan no ned amoi 20 Joahr oid. Nochm Konzert homma in a Beisl gschaut. Zu der Zeit homma söwa sehr vü mit Drogen herumexperimentiert und i woa ois aundare ois nüchtern - ois i auf amoi di bei da Bar gsehng hob.

I hob di gfrogt, ob du da "one and only god damned Lemmy fucking Kilmister" bist. Du host es bejaht und uns zum Saufen mit dir eiglond.

Hätt i gwusst wie trinkfest du bist, daun hätt i di ned amoi griaßt. Du Hund host uns untern Tisch gsoffn, dass i heit no fett bin. I hob gfrogt wie du des mochst, du host a weißes Puiva aussazong, glocht und gsogd "I'm a Speed freak!" - und gschnupft.

A weiteres unvergessliches Konzert woa eicha Auftritt in Budapest. Domois woa da Eiserne Vorhaung no vorhanden und i glaub es woats die erste berühmte westliche Band, de duat auftretn is. Daunk meiner Doppel-Staatsbürgerschaft (magyar vagyok) homma duatn hifoahrn kennan.

I woa ana der ersten der durch die Kontrollen kumman und Richtung Bühne grennt is.

Auf amoi san do lauter Soldaten mit da Woffn in der Haund gstaundn und hom auf uns gezielt. Wos tuat ma do? I wuitat auf die Knia foin und "Ace of Spades" singan - wenn ma scho an Obgaung mocht, daun mit da richtigen Band.

Wos is im Endeffekt passiert? Wir, die Fans, hom si ned einschüchtern lossn und san afoch weidergrennt. ZACK ZACK ZACK - olle Suidotn san niedergrennt woan.

Es is kein einziger Schuss gfoin! Und die Ungarn hom sogoa die Texte kennan. Bemerkenswert.

Unsare letzte Face-to-Face Begegnung homma vor a boa Joahrn in Los Angeles ghobt, ois i di in a Rainbow Bar troffn hob. Du Oarsch host mi obgfüllt wie an klanan Schuibuam. Da Joey Belladonna vo Anthrax woa daun a do, owa den hob i neama gscheid gsehng. So vü Whisky, des woa neama normal. I bin am Bodn gleng, hob i mi vo obn bis untn augspiem, du bist lässig am Barhocker ghuckt (nüchtern?!??!), host mi auglocht, mit deiner Tschick angeäschert und mi in die stabile Seitenlog glegt. Danoch hot mi die Rettung ghuit und i hob die amerikanische Krankenhauspolitik kennenlernen diafn. Bist deppat, des woa teia......

Wie vüle Motörhead Konzerte hob i ma in die letzten 40 Joahr wui augschaut? I hobs versucht zu zählen, owa es geht ned. I trau mi owa fost wettn, dass mehr ois 100 woan.

Hätt i gwusst, dass i di am Nova Rock 2015 es allerletzte moi live siech, daun hätt i ma die letzte Nummer, Overkill, doch no bis zum Schluss aughuacht und dir den Applaus gegeben den du dir verdient host!

Die meisten Leid wean des ned vasteh, owa du host mei Leben geprägt wie nur gaunz wenige Menschen zuvor. Fia mi woast du immer mei persönliches Vorbild. Auf ois Scheißen, sei Ding durchziang und Spaß am Lem hom. Ausm Koffer leben und vü vo da Welt sehng. Party, Spaß und Frauen - Sex, Drugs & Rock'n'Roll. A Lebenseinstellung, de i sehr laung geteilt hob, wobei i die "Drugs" boid durch "Girls" ersetzt hob.

I bin ned verheiratet, hob ka Freindin, kane Kinder und des wird si a ned ändern. Wir hom bezüglich Frauen a ähnliches Schicksal geteilt, a Grund mehr warum i zu dir iagandwie aufgschaut hob.

Ma kau es total übertrieben nennen, owa i hob heite an Freind valorn. Wahrscheinlich hättast di sowieso ned an mi erinnert fois ma si moi gsehng hom, owa du woast afoch mei greßtes Vorbild und die boa Moi wo wir uns troffn hom, hob i immer a Gaude mit dir ghobt.

Du woast a sehr bodenständiger, belesener und intelligenter Mau mit dem ma die ärgste Gaude ghobt hot.

Danke fia ois Lemmy! Du wirst ma fehlen.

I kau ma mei Leben ohne Motörhead Konzerte eigantlich fost ned vorstön, keine Ahnung wie des in Zukunft ausschauen wird, owa i loss mi üwarroschn.

Wir, die Fans, die Motörhead Family, werden dei Andenken bewahren und dei Lebenswerk in unseren Herzen tragen! Fia einige woast du nur a schircha Hawara mit zwa Warzen im Gsicht und ana schirchn Stimm, owa fia vüle woast du afoch a Gott am Bass, der wahre King of Rock'n'Roll ana der wenigen Künstler, der auf die Meinung der aundaren gschissn und immer gsogd hot wos a si grod denkt.

Danke Lemmy! I kau da ned oft genug danken. Mir rinnan grod die Tränen owe, wie wenn i die Grabrede fia an guadn Freind schreim würd.

I verneige mich vor dir und deinem Lebenswerk.

Als wahrer Motörhead Fan von der Haarspitze bis zu den Zehennägeln is es fia mi a Pflicht, dass ma di noch deinem irdischen Ableben nomoi so richtig hoart feiern.

Desweng hob i vorher meine Koffer gepackt und foahr nochher aufn Flughofn. Die Leid die Motörhead im Bluat hom, wean jetza ollesaumt noch Los Angeles fliang und ins Rainbow pilgern, um die härteste Party aller Zeiten fia die Legende Lemmy Kilmister zu feiern!

So makaber es klingan wird, owa i gfrei mi scho sehr auf des Gelage im Rainbow. Bin gspaunnt wie vü weltberühmte Musiker si unters Vuik mischen. Wer schomoi duat woa was nämlich, dass ma im Rainbow afoch so mir nix dir nix nem die berühmtesten Rockmusiker sitzen kenntat.

Schwoarze Schuach, Schwoarze Hosn, Schwoarze Kappe und mei Motörhead Jeansjackn de i scho seit 100 Joahr mit mir trog.

Auf gehts, loss ma die Legende würdig hochleben. Los Angeles, i bin bereit.

R.I.P (return if possible)

Ian Fraser Kilmister

1945 - 2015

49% Motherfucker

51% Son of a b*tch

3
Ich mag doch keine Fische vergeben
Meine Bewertung zurückziehen
Du hast None Fische vergeben
6 von 6 Fischen

bewertete diesen Eintrag

MartinMartin

MartinMartin bewertete diesen Eintrag 29.12.2015 20:01:39

Grexi

Grexi bewertete diesen Eintrag 29.12.2015 11:37:18

Duni

Duni bewertete diesen Eintrag 29.12.2015 10:33:52

4 Kommentare

Mehr von Da Fraunz