I was, dass des alles andere ois lustig is, owa i was afoch ned mit wem i sonst drüber reden sui, deswegen wende i mi an eich.

I hob seit a boa Monaten wos mit ana Frau am rennan und es läuft total super. Sehr lange hob i mi gegen Beziehungen geweigert, da mi mei große Liebe damals bahoat beschissen hot und i si dabei live dawischt hob. Egal, zruck zum aktuellen Gspusi.

Wir hom wirklich sehr vü Spaß miteinaunda. Unsre Freind song sogar, dass des a Traumbeziehung is und es woa wirklich so bis vor a boa Tog.

Sie hot si in letzter Zeit sehr komisch verhoitn – woa afoch neama de Frau de i kennenglernt hob und vielleicht sogoar auf meine oidn Tog heiraten wuitat. Es hot vor zwa Wochn augfaungan, sie hot a neiche Hockn griagt und is öfters mit ihre Kollegen fuatgaungan. I hob immer gfrogt, ob i mitkumman diafat, owa sie hot gmant, dass des fia mi zu fad warad.

I hob wirklich ka Problem wenns allanig fuatgeht, des homma davor a scho hin und wieder gmocht, owa mittlerweile passiert des drei bis viermal pro Woche. I hob ihr angeboten, dass i sie abhole, owa si hot immer abgelehnt und drauf bestaundn a Taxi zu nehmen.

Sie kummt daun immer sehr spät ham, i hör sogar es Auto, owa es parkt immer um die Eckn und bleibt sehr laung steh. Des find i persönlich sehr komisch.

Und die vülen Telefonate….es is oft vorkumman, dass i ins Zimmer kumm und sie telefoniert. Sie schaut mi daun nur au und sogt, dass jetza ned reden kau, legt auf und rennt weg. Vorgestern hot ihr Handy gläutet und i wuitats ihr bringan. Sie is total auszuckt ois i gfrogt hob wer des leicht woa und hot behauptet, dass i eifersüchtig bin und ihr nachspioniere.

I bin ma zu 100% sicher, dass an aundan Hawara hot.

Gestern am Abend is wieder fuatgaungan und do hob i mi entschlossen, herauszufinden wos los is. I woa beim Bundesheer, i kau mi auschleichn und spionieren.

Es woa geng 23 Uhr und i bin aussegaungan um auf sie zu woartn. I was, ned grod leiwaund, owa i woa afoch total fertig mit da Wöd. I hob es Auto kumman ghört und mi hinter meinem Audi vasteckt. Des aundare Auto is kumman, owa es woa ka Taxi. Und i bin ma sicher, dass sie de zwa im Auto sehr laung geküsst hom. Daun hob i no bemerkt, dass mei Auto beim Kofferraum zum Rosten beginnt.

Oiso, wos sogts ihr? Suit i mei Auto ind Werkstott bringan, oder kau i den Rostfleck ohne Probleme söwa entfernen?