Bundesheer. jeder männliche jugendliche muas hin, oder er mocht zivi, owa auf jedenfoi bleibt erm ans vo de zwa ned daspoat.

Fia mi is festgstaunden, i wü des schnö wie megli umebringa. oiso bundesheer. wie in an vo meine aundan blogs steht, hob i aum 25.8.2012 nochmusterung khobt wegen mein knie, und hob daun mit 1.9.2012 einrückungstermin khobt. Ba da nochmusterung hob i daun a glei song kina wo i hin wü, guad woa das mi do bevorzugt haum, i deaf so schnö wie megli eiruckn, und kumm daun a duathi wo i wü. damit i in mein leben ned aufkhoidn wia haums gsogt. mia wa scho glei a "daun schickts ma afoch haum und lossts mi in rua" auskema. wa owa ned so gscheit gwesn. Festgstaunden is daun grundausbüdung hob in großmittel, jansa kaserne. noch da grundausbüdung nu foaschui in st. pötn und daun kroftfoara in st. pötn.

aukuma in großmittel, ziemli zeitig in da frua. bist depad des is aum oasch da wöt. rund um de kasern is a riesiges gelände mit genau nix, panzerübungsgebiet. guad, amoi duat hi kuma, zimmer und spint griagt, so a klans biachl a, und daun hots amoi khassn, aufe ins zimmer, woaten, biachl lesn, dienstgrade lerna. bis zmittog hot des woaten dauert, daun sama essen gaunga. woa leiwaund de haum zu dea in großmittel an neichen speisesoi griagt, guads essen gwesn. de nexten zwa tog woan ausfossn vom gaunzen zeig, und untersuchung. in de zwa tog san zwa sochn passiert, wo ma i nua aum kopf griffen hob, und ma denkt hob, oida vota es sats banaund.

fall1: zwa aus mein zimmer haum a a operiertes knia khobt. da ane voa an joa, da aundare voa 2 wochen, dea hot a de nähte nu drin khobt. beide san ins Heeresspitoa kuma, kurz HSP. damit se a oazt des auschaut. wies wida do woan: ba dem wo de operation scho a joa hea is, haums fest gstöht wenn a se voi des knia lahnt, sei gaunzes gwicht drauf duat, daun knackts leicht. erm duad nix weh oda wos, es knackst nua. jedenfois haums erm untauglich gschrieben, dea is wida hamgfoan. ba dem dea voa 2 wochen operiert woan is, de haums de nähte aussa dau, sport- exerzier und marschbefreiung, dea is dabei blieben.

fall2: olle hauma unsa zeig khobt, kurz vorm dienstschluss sama banaund gstaunden, gruppenkommandant: (zitat) oiso burschen, es wissts es woascheinli eh scho owa ban heer gehts um nix. dats bitte afoch des wos ma eich sogt, nix hinterfrogn, afoch duan, daun geht des schnö vorbei, und wir haum kan bahö.

guad, de grundausbüdung woa recht entspaunt. mei gaunze kompanie is daun weg kuma vo dea kasern, dementsprechend hot se kana vo duat wos gscheat. dienst woa imma vo 7 bis 16 uhr. ausbüdna woitn kane überstunden mochn, weis ses ned zoit griagn. woa leiwaund. den september woas has. 28 grad locker. ban woffen und schießdienst san wia unta de bam khuckt, unsa wochmasta (dea woa leiwaund) is mit uns unta de bam gsessen, wia haum rauchen deafn, und ea hot uns hoit wos dazöht. de voikontingentkompanie (des san de, de duat blieben san) san gwetzt woan. ba de 28 grad in da sunn mitn ABC aunzug durch woid, in de sunn, woffen zlegen in da montur ois.

Jedenfois woa i 3 wochen in großmittel. ka feldwochen, kan marsch, nix. schoaf schiassen is se grod nu ausgaunga. daun hots khassen ob noch st. pöten. ma hot se möden kina wöcha foazeigklass ma mochn wü. i hob mi voahea scho moi mitn vota vo mein besten freind kuz gschlossen, dea is foalehra in st. pötn, dea hot gosgt i soi b1 nehma, is aum afochan. guad hob i b1 gnumma, hob daun owa b2 griagt. do hob is nu ned gwusst, owa do woas daun voabei mitn gmiadlich sei ban heer. zwa wochn foaschui, da foalehra woa a richtige gaudi. in da theorie host glernt, im heeresauto wiad ned graucht. Puch G, alle planen hoch, sunnbrün auf, hinten auf da flächg gsessen, foalehra woa da erste dea se ane augraucht hot. muadsdrum schens wetta khobt, durch de wachau gfoan, rund um krems, stift göttweig, zum opfebaun um frische öpfe. so lossts ses leben.

daun hauma den heeresschein a khobt. i hob mi scho auf a bissl foan und sunst nix duan eigstöht. hob i vagessen kina. KUO is dahea kuma: du foast mitn kommandenten. wos hast des? du foast mitn militärkommandeten vo niderösterreich und fiast erm üwaroi hi wo a wü. nau serwas. aufgaungt hob i mit dem mitte oktober. aufkheat mitte februar. in dea zeit bin 24000 km gfoan. und glernt wie ma in an auto gmiadlich schloft. de meisten foaten woa iagendwos weil a se wo an einehaut mit seine freind. des positive, ea hot a ziemlich afoche oat khobt: wennst des duast wos er sogt, und respekt zagst, kummt amoi wos zruk. und ea hot a gosgt: wenn ich da bin, sind sie auch da, sonst nicht. hot khassen: wenn er frei khobt hot hob i a frei khobt, wenn er nua in da kasern woa und nirgends hi miassn hot, hob i a frei khobt. des hot KUO ned wiakli passt, vaoim in de semesterferien wo a ski foan woa, hob i a wocha frei khobt. owa wos soi a mochn, oberstabswachmeister gegen brigadier...is kloa wea valiert.

I bin jedenfois mit dem typen sehr vü gfoan. des meiste aun an tog woan 900 km. und siach grod des is schowida ziemlich vü text. i glaub i werd des bundesheer thema auf zwa blogs aufteilen.

bis zum nächsten moi. pfiat eich

2
Ich mag doch keine Fische vergeben
Meine Bewertung zurückziehen
Du hast None Fische vergeben
6 von 6 Fischen

bewertete diesen Eintrag

Silvia Jelincic

Silvia Jelincic bewertete diesen Eintrag 14.12.2015 23:17:03

fischundfleisch

fischundfleisch bewertete diesen Eintrag 14.12.2015 23:17:03

2 Kommentare

Mehr von der_von_nebenan