Fost auf dem Tag genau vor drei Jahren hob i mi auf Facebook angemeldet und mei Seite „Da Fraunz“ gegründet. (Ihr kennts eich vo mir aus gfrein und darauf austoßen)

Heite, drei Joahr späda, frog i mi eigantlich, wie i des so laung ausghoitn hob.

Es hot ois gaunz normale 0815 Spaßaktion begonnen, nachzulesen in meinem Buch „Gschichtln aus mein Lem“. I hätt dem gaunzen vielleicht a Lebensdauer vo maximal einer Woche gem.

Owa aus irgendan Grund, hob i noch zwa Tog scho mehrere tausend Gefällt Mir ghobt – nur weu i dem Faymann auf die Pinnwaund gepostet hob, dass er a Dodl is. Natialich in ana viel detaillierteren Botschaft.

Domois woa ois leiwaund. I hob lauter Bledsinn gschriem, hin und wieder moi mei eigene Meinung. Den Leuten hots taugt. Egal ob i üwan Mayer sein Hund oda üwan Bundesheinz gschriem hob.

Daun hob i mit den Memes augfaungan und die Leid san so richtig narrisch noch mir woan. Obwuihs nur Büdln mit an deppatn Gsatzl woan. Najo, hin und wieder woans scho lustig, stimmt :)

Meme gepostet – extrem vü Leute lochn, freuen sich und feiern es Lem.

Erfahrung aus meinem Lem gschriem – extrem vüle Leid lesens, gfrein si, werden nochdenklich und trauen sich über ihre Probleme zu sprechen.

Perfekt! I bin zu an Facebook Psychologen woan. Und he, ohne Schmäh, mir hot des wirklich extrem taugt, mir taugts bis heite. Wenn wer a Problem hot, daun sui er mir schreim. I schreib garantiert zruck, und wenn die Nochricht no so laung is!

Owa in letzter Zeit weht a aundara Wind auf Facebook.

Egal wos du postest, es kummt immer a Hauch vo negativer Resonanz. In 99% der Fälle is des gaunze politisch motivert.

Beispiel (total fiktiv!) – Facebook Status: „In da U-Bauhn an Schas lossn, gaunz laut gfrogt, warums do noch Popcorn riacht. Olle Leid faungan zum Riachn und  i zum Lochn au.“

Einige Leid lochn üwa den Schmäh, noch a boa Minuten schreibt iagandana „Typisch Sozi!“, „de scheiß Linken“, „du rechtsextremes Oarschloch“, „scheiß Nazi, tuat scho wieda vergasen!“

Wie gesagt, des woan total fiktive Beispiele – brauchts mi oiso fia de Aussog wengan vergasen ned aun den Pranger stellen ihr humorbehinderten Dodln.

Owa genau do samma beim Thema. In letzter Zeit is da Humor afoch verloren gegangen. Aus irgendan Grund kennan die Leid neama lochn. Was i ned wos olle hom, am Aufaung hob i jo auf a Verstopfung getippt, owa des warad bei ana derart großen Menge an Menschen wirklich bedenklich und mitleiderregend. Leck Oarsch, so a Verstopfung muas schirch sei…. :(

Es is wirklich traurig, dass ma mittlerweile bei jedem Witz aufpassn muas, dass ma ned vo olle Seiten mit Steinen beworfen wird.

Und immer wieder muas ma si auhuachn, dass ma jo a politische Ader entwickelt hot. Desweng nomoi fia de gaunzen gehirnamputierten Intelligenzbestien, merkt seich den nächsten Sotz bitte gaunz guat und schreibts eam eich notfois iagandwo in Griffweite auf, damits es beim nächsten moi wenns wos vo mir sehts glei wissts.

I BIN WEDER RECHTS NO LINKS, MI INTERESSIERT KA ANZIGE PARTEI IN ÖSTERREICH, OLLE POLITIKER IN ÖSTERREICH SAN UNFÄHIGE OARSCHLECHA DE NUR AUF SESSELN SCHASLN KENNAN OWA VOM HACKLN GENAU NIX WISSN, FAYMANN UND STRACHE SAN GLEICH DEPPAT WIE VASSILAKOU, HÄUPL, GLAWISCHNIG, HUAWA PEPI UND CO, I BIN KA SOZI UND A KA FREIHEITLICHER, ES ANZIG GRÜNE BEI MIR IS MEI WIESN UND ES ANZIG SCHWOAZE IS MEI KAFFEE, PINK IS SCHEISSE UND GÖB IS MEI DUSCHSCHWAUMM – DEN REIB I MA OFT BEIM OARSCH ENTLAUNG! Oiso kennts eich aus? Eppa  wuits es ned woahr hom, hobts es üwalesen oda wos was i. Jedenfois is ma daunk suichn Leid wie eich kloa, warum ma bei da PISA Studie in Oarsch gfoahrn san.

Jednfois zahts mi neama mei wertvolle Zeit auf Facebook zu verschwenden. Zurzeit geht’s bei mir in da Hockn bissl stressig zua (eh kloa, immer wauns koit wird!), i hackl mindestens 11 Stunden am Tog (minimum!) und kum vor 18 Uhr ned ham. Warum sui i mi daun a no zu Facebook haun und versuchen eich den Tog a wengl zu versüßen, wenn eh wieder iagandwöche humorbehinderten Vuikoffan daherkumman und ois vasauen?

Mir fehlt afoch die Motivation dazua. Die Lust zum Posten schwindet von Tag zu Tag. Die Flamme des virtuellen Ehrgeizes wird klana und klana, die Dunkelheit drumherum wird imma größer.

I hob keine Ahnung, wie laung i no auf Facebook bleib. Vielleicht gibt’s mei Seitn im nächsten Sommer no immer. Vielleicht bin i ob nächster Woche komplett weg und verschwunden (außer im Datenspeicher vo Facebook, wie woa des mit Privatsphäre?). Oder vielleicht werdens no a boa Wochn, wer was des scho? I was ned.

Das Wichtigste wurde vo mir in den letzten drei Joahren gschriem. I hob wahnsinnig vüle Erlebnisse und Weisheiten aus meinem Leben mit eich geteilt. I find, dass i sehr vülen Menschen in schwierigen Situation geholfen und vielleicht sogoa des ane oder aundare Leben grettet hob – ohne Scheiß!

Vüle Menschen hom a aundare, positivere Einstellung fias Lem daunk mir bekommen – zumindest hom mir des einige Leid gschriem. Aufgrund meiner Reisen, hom si a boa Leid im Sommer in an Zug ghaut und afoch so auf gut Glück a boa Städte in aundaren Ländern augschaut. Bissl Abenteuerfeeling, besser ois beim Schreibtisch zu verrecken.

Die besten Gchichtln aus mein Lem wurden geschrieben, i wissat ned, wos i auf Facebook no mochn bzw. erreichen könnte. Desweng is da Reiz und die Motivation afoch neama do bzw. neama so hoch wie friacha.

Fakt is: Mei Aktivität auf Facebook hot a Ablaufdatum! Waun genau, des was kana, des wird afoch gaunz spontan gmocht. I wia afoch weg sei. ZACK und futsch!

Owa natialich hob i den Aunstaund, dass i mi davor no verabschiede. I schleich mi ned afoch so, ka Aungst.